GLACOKI
JEST TROCHA ŁYSYCH CHOPÓW NA ŚWIECIE,
A SOM TO LUDZIE BARDZO ŁOSZCZYŃDNI.
LECZ CHYBA WSZYJSCY TO DOBRZE WIYCIE
ŻE W PEWNYCH SPRAWACH SOM NOM NIYZBYŃDNI.
ŁYSY NIY MUSI SIĘ PRZECA CZESAĆ
BEZ TO NIY KUPI NIGDY GRZEBIYNIA.
WOSÓW NIY CIEPNIE NIGDY DO PIECA,
NO I FRIZURY NIY MUSI ZMIYNIAĆ.
NIY POTRZEBUJE KUPIĆ SZAMPONU,
GROSZ ZAŁOSZCZYŃDZI NA CO INNEGO.
NIY MO SUSZARKI ANI ŻEL -TONU
FRIZER TYŻ NIY MO MZ NIM NIC WSPÓLNEGO.
GLACA PUCUJE BLANK DO POŁYSKU,
MO BABA WIYŃCY DO CAŁOWANIO.
BEZ TO GO WIDAĆ Z DALEKA W SCISKU,
SŁOŃCE MO DUŻO MIEJSCA DO GRZONIO.
ALE SZCZYŃŚLIWI SOM TE ŁYSOLE,
A TRZA TO PEDZIEĆ BARDZO DOSADNIE:
BO CZY HANYSY, CZY TO GOROLE,
TO WOS IM NIGDY Z GOWY NIY SPADNIE.
Henryk Polok
JAK WIDZA MAŁYSZA...
NIY MIELI MY DUGO IDOLI,
CO SAMI PORADZOM SIĘ SZKOLIĆ,
I MAJOM ZAWZIYNTO NATURA-BO W GÓRACH.
A DZISIOJ NOM TAKICH POTRZEBA,
CO TROCHA PRZIBLIŻOM NOM NIEBA,
I JUŻ ŁOD BAJTLA W MIG,TRYNUJOM TAK JAK NIKT
I GIBKO CHYTAJOM SKOKÓW DRYG.
JAK WIDZA MAŁYSZA TO DYSZA
I NIC JUŻ NIY CZUJA, NIY SŁYSZA.
BO KOŻDY JEGO SKOK,TO DLO MNIE WIELKI SZOK
NIYCH LOTO, NIYCH FURGO TAK CO ROK.
NA PEWNOM TO NIY JEST PRZIPADEK,
BO MOŻE ADAMA JUŻ DZIADEK
PRÓBOWOŁ ŁODDOWAĆ SKOKI-NA BOKI.
A DOBRZE ŻE DZIADEK MIOŁ WNUKA,
CO UMIOŁ TALYNTU POSZUKAĆ
I DZIADKA NAŚLADUJE, ŻE SKOCZNI MU BRAKUJE
BO ZOWDY NA PROSTYM JUŻ LĄDUJE.
JAK WIDZA MAŁYSZA ...
NIYCH TEROZ MU KOŻDY POMOŻE
BO SOM TEGO STRZIMAĆ NIY MOŻE,
A ŁON NIYCH PAMIYNTO ŁO BOGU-NA PROGU.
POLOKI ŚCISKEJCIE DURCH KCIUKI,
I BIERCI Z ADAMA NAUKI,
BO ŻEBY MEDAL MIEĆ,TO TRZEBA PRZECA CHCIEĆ,
DO CELU, DO CELU PEWNIE PRZEĆ!
JAK WIDZA MAŁYSZA...
Henryk Polok
Uwe i Wili
Uwe i Wili w jednej stali wili,
Uwe na wierchu, a Wili na dole.
Uwe spokojny nie wadzi nikomu,
a Wili wyrabioł choby we stodole.
To pies, to hazok, ciepał w nim ryczkami,
Gupioł i turpioł durch trzaskoł dźwierzami.
A kady szczykać naczął z gazpatronów,
To dymu pełno było w cołkim domu
Uwe sie wnerwił i ślozł na dół do niego
I pado: "Wili, jo nie strzymia tego!"
A Wili na to: "Co komu do jemu, a jemu do komu,
Ty giździe pieroński, jo jest w swoim domu."
Uwe po gowie poskrobał sie ino,
Poszoł do siebie i coś medytował...
Rano Wili jeszcze na szezlongu chrapie,
Naraz mu coś z gipsdeli na kichol kapie.
Serwał sie Wili, leci ku górze.
Stuk! Puk! Zamknione!!!
Filuje se przez dziurka: Hen Jezu, cało izba w wodzie,
A Uwe se siedzi z wędką na komodzie.
"Was machts du, Uwe", "Jo se fisza łowie"
"Du bist Idiot, mnie kapie na gowe!"
A Uwe mu na to: "Co komu do jemu, a jemu do komu,
Ty giździe pieroński, jo se w swoim domu."
Murzinek Bambo
W Africe miyszko Bambo, Murzinek,
Blank czorny, mały lokaty synek.
Czorno mo matka, łojca czornego,
Ujka i ciotka, dziadka i ... kozdego.
Mo piykno chałpa - by ją zbudować
trza mieć patyki, deski i trowa.
Bo przeca lepszyj chałpy nie trzeba
Jak sie rok caly hyc leje z nieba.
Bestoż to sagie są Afrykony
I mało kery je łobleczony.
Bestoż fest dużo se uszporują
Bo czopek, mantli...nic niy kupują.
Bambo Murzinek to mądry synek....
I niy mo w szkole samych jedynek.
Bo sie mądrości wkłodo do gowy
W swyj afrykońskij szkole ze trowy.
W szkole tyj niy ma ławek, tablicy
I gimnastycznyj sali - by ćwiczyć.
Tam wszyscy afrykońscy szkolorze
Mają sie od nos troszyczka gorzyj,
Bo brak im heftów, taszy z książkami,
Bestoż po piosku piszą palcami.
Lecz skuli tego tyż fajnie mają,
Bo im nic do dom niy zadowają!
Jak już Murzinki w szkole głód mają
To przerwa robią i se śniodają.
Ale niy mają tasz ze sznitami,
Ani sklepiku ze kołoczkami.
Głodny Murzinek se w las zaleci,
By se na drzewie fest pomaszkecić.
Może se urwać figi, daktyle
Lub po banany na drzewo wylyźć.
A jak go suszy to zamiast Coli
Na fest sie wielko palma wgramoli,
Kaj sie napije bardzo zdrowego,
Mlyczka z łorzecha kokosowego.
My tu na Śląsku, czy tam daleko,
Za siódmom górą, za siódmom rzeką...
Mieszkają ludzie - kożdy w swym domu
I to niy wadzi przeca nikomu,
Że jedyn jy kołocz a inny daktyle.
Porozmyślej o tym choćby przez chwilę!
Pan Hilary
Loto, rycy pan Hilary, na dekel mu piere
Bo kajś ten boroczek posioł swoje brele.
Szuko w galotach, szakyt obmacuje
Przewraco szczewiki, psińco znajduje.
Bajzel w szranku i w byfyju
Tera leci do antryju.
"kurde" - woła - "kurde bele!
Ktoś mi rombnoł moi brele!"
Wywraco leżanka i pod nią filuje,
Borok sie wnerwio, gnatow już nie czuje.
Sztucho w kachloku, kopie w kredynsie,
Glaca spocona, caly się trzynsie.
Pieroński brele na amyn kajś wcisnyło
Za oknym już downo blank sie sciymniło
Do zrzadla oroz zaglondo Hilary-
Aż mu po puklu przefurgły ciary.
Spoziyro na kichol, po łepie sie puko,
Bo znejdly sie brele - te, co tak ich szukoł.
Czy to ni ma gańba? - Powiydzcie sami,
Mieć brele na nosie a szukać pod ryczkami.
Lokomotywa!
Jest na banhowie ciynszko maszyna
Rubo jak kachlok - niy limuzyna
Stoji i dycho, parsko i zipie,
A hajer jeszcze wongiel w nia sypie.
Potym wagony podopinali
I całym szwongym kajś pojechali.
W piyrszym siedziały se dwa Hanysy
Jeden kudłaty, a drugi łysy,
Prawie do siebie niy godali,
Bo się do kupy jeszcze niy znali.
W drugim jechała banda goroli
Wiyźli ze soba krzinka jaboli
I pełne kofry samych presworsztóf
I kabanina prościutko z rusztu.
Pili i żarli, jeszcze śpiywali,
Potym bez łokno wszyscy rzigali.
W czecim Cygony, Żydy, Araby
A w czwartym jechały zaś same baby.
W piontym zaś Ruski. Ci mieli życie!
Sasza łożarty siedzioł na tricie.
Gwiozda mioł na czopce, stargane łachy,
Krziwiył pycholem i ciepoł machy.
A w szóstym zaś były same armaty,
Co je wachował jakiś puklaty.
W siódmym dwa szranki, pufy, wertikol,
Smyczy maszyna może donikąd.
Jak przejyżdżali bez Śląskie Piekary
Kaj wom to robiom kółka do kary,
Maszyna sztopła! Kufry śleciały
I każdy latoł jak pogupiały.
To jakiś ciućmok i łajza!
Ciupnął i ślimtoł sygnal na glajzach.
Mog iść do haźla abo do lasa,
Niy pokazywać tego mamlasa!
Potym mu ale do szmot nakopali,
Maszyna ruszyła, cug jechoł dali.
Bez pola, lasy, góry, tunele,
Dar za sobom samym te duperele
Aż się zagrzoły te biydne glajzy,
Maszyna sztopła i koniec jazdy.