O tym jak dochtor

wylyczył zmierzło baba

Prziszła baba do dochtora,

lamyntuje i biadoli,

słuchejcie no panie dochtor,

cosik mnie tak w boku boli.

W boku boli w krziżu sztrzyko,

ni mogą se z tym poradzić,

a mój stary yno godo,

dochtor mogom coś poradzic.

Sromotne je to chorobsko,

bo i z tego bolom rynce,

i niy godom już ło szłapach,

jo je coło w srogij mynce.

Zbadoł dochtor zmierzło baba,

i łostukoł jak trza było,

pado, chyć sie za robota,

bydzie ci sie lepij żyło.

Robota cie chnet wylyczy,

i niy bydziesz lamyntować,

a jak by ci sie niy chciało,

musisz se truła szykować,

Jak baba prziszła do chałpy,

i łosprowio to starymu,

wiysz, tyn dochtor niy je gupi,

bo łon lyczy po nowymu.

Chop jak rano sie łobudził,

myśloł że prziszoł do nieba,

w chałupie taki porzondek,

wszystko leży tam kaj trzeba.

Baba piyknie się łoblykła,

i serwetym stół nakryła,

zrobiła łobiod niydzielny,

kufel piwa postawiła.

Chop myśloł że tyn dochtor.

Ni mo łepy łod parady,

bo yno łon jedyn wiedzioł,

jak sie zabrać za te baby.

I tak prawi do swyj ślubnyj,

na kontrola idź dziubeczku,

bo tyn dochtor jest fest mondry,

i wylyczy cie kwioteczku.