A miała być haja w lesie
W małym lesie kajś wśrod krzokow
zebrało sie pora ptokow,
za kwila piorka polecom
tak sie wadzom i tak skrzeczom.
-Po mojimu- kracze wrona,
-a wszystkimu winna łona,
bo zachować sie niy umi
do tego nic nie rozumi.
I jeszcze gańba przinosi
po lesie klachy roznosi,
jak najynto głośno skrzeczy,
bez przerwy godo łod rzeczy.-
-Niby żeś je takom damom,
niby mondrom jak Salamon,
kraczesz, że aż bolom uszy,
a nas to i tak niy ruszy-.
-Moji drogi nie wadzcie sie,
cicho mo być dzisiej w lesie,
bo wykluły sie pisklynta,
a tera śpiom niebożynta.-
Po polu sie echo niesie
że miała być haja w lesie,
sojka sprawa załatwiła
jeszcze nim w rajza ruszyła.
Kajś daleko lecieć miała,
a jednak zrezignowała,
bo wybiyro sie za morze
ale wybrać sie ni może.